ИИДМБ: ШҚО-да әктәс өндіретін зауыт салынады
18 Қараша, 2015 08:56
ШҚО-ның Курчатов қаласында ҮИИД мемлекеттік бағдарламасы аясында алғаш рет бірінші сұрыпты әктәс өндіретін зауыт салынады, деп хабарлады ШҚО-ның Ақпараттық орталығы.
Айта кетсек, ел аумағында бірінші сұрыпты әктәс өндіруші кәсіпорын жоқ. Тек Семей қаласындағы кальций гидроксидін өндіретін мекеме әктәсті Өзбекстаннан сатып алып отыр.
«Қазіргі таңда жобаның барлық құжаттары «Бәйтерек» ұлттық басқарушы холдингі» АҚ-на жіберілді. Қаржы мәселесі шешілгесін, бірден құрал-жабдықтар сатып алынбақ, – деді баспасөз маслихаты барысында Курчатов қаласының әкімі Нұрбол Нұрғалиев.
Құны 1 665 млн теңге құраған кәсіпорын 2017 жылы іске қосылып, инновациялық жолмен көмір газын синтездеу арқылы әктәс алады деп жоспарлануда.
Жаңа кәсіпорын құрылысы барысында 100 адамды, ал толық қуатына қосылғасын 157 адамды жұмыспен қамтамасыз етпек.
