Норвегияның Винстра қаласында Қазақстанның Құрметті консулдығы ашылды
Шараға бизнес-элитаның, қала мэриясының, сарапшылар ортасының өкілдері және танымал қоғам қайраткерлері қатысты.
Құрметті консул Кристиан Миккель Доблоуг, танымал бизнесмен, Норвегияның өндірістік, ауыл шаруашылығы, жоғары технологиялық өндіріс және денсаулық сақтау мен білім саласының орталығы болып саналатын аталмыш маңызды аймағында қазақстандық мүддені алға ілгерілететін болады.
М. Доблоугтың биржа операциялары, сауда, жылжымайтын мүлік пен бағалы қағаздарға инвестициялау салаларында жұмыс істейтін компанияларды басқарудағы тәжірибесі өте мол. Норвегияның саяси өміріне де белсенді араласады, қайырымдылық шараларымен айналысады.
Қазақстанның Норвегиядағы елшісі Қайрат Әбусейітов өз сөзінде атап өткендей, Құрметті консулдың қызметі іскерлік байланыстарды дамытуға, жаңа серіктестерді табуға, мәдени-гуманитарлық байланыстарды кеңейтуге септігін тигізетін болады.
