Таразада «Інжу» мектеп-гимназия, балабақша кешені ашылмақ

5 Қараша, 2013 11:15

Жақында Тараз қаласында мемлекеттік-жеке серіктестік бойынша Інжу» мектеп-гимназия, балабақша кешені тұрғызылған болатын, деп Жамбыл облысы әкімдігінің бспасөз қызметі хабарлады.

«Тараз қаласының бас жоспарына сәйкес облыс орталығы күн санап көркейіп келеді. Жыл басынан бері бір ғана «Бәйтерек» мөлтекауданында «Назарбаев» зияткерлік мектебі, екі бірдей балалар ауруханасы мен спорт сарайы бой көтерді. Енді міне, жақын күндері «Інжу» мектеп-гимназия, балабақша кешені де балаларға есігін айқара ашпақ», - деп хабарламада нақтыланған.

«Бәйтерек» мөлтек ауданында сәулеті келіскен тұрғын үйлер мен су жаңа ғимараттар бой көтерді. Инфрақұрылым тартылып, сапалы жолдар салынған. Осындай нысандардың қатарын «Інжу» кешені толықтырып отыр. 3 қабатты ғимаратта 280 орындық балабақша мен 1-6 сыныптарға арналған мектеп-гимназия жұмыс істейді. Мемлекеттік-жекеменшік әріптестік негізінде құрылған білім беру мекемесінде оқыту екі тілде жүргізіледі.

Бір сөзбен айтқанда, жұмыс басты жандардың енді бала білімі мен тәрбиесіне алаңдауына негіз жоқ. Үштілді еркін меңгерген, білімі бәсекеге қабілетті, жан-жақты азамат етіп тәрбиелеу – «Інжу» мектеп-гимназия, балабақша кешені ұжымының басты мақсаты.

Барлық жаңалықтар