ИИДМБ: «Тараз химиялық паркі» АЭА-да 2400 жұмыс орны ашылады

Облыс басшысы Кәрім Көкрекбаев алдымен «Kaz Mia» ЖШС-ның құрылыс жұмыстарымен танысты. Кәсіпорынның қуаттылығы 2 мың тонна дәрілік мия тамырын өңдеуге жетеді. Жобаның жалпы құны-600 млн. теңге, 60 адам тұрақты жұмыспен қамтылады. Айта кету керек, бұл жоба инвестордың жеке қаражатымен салынуда.

Облыс әкімі, сонымен бірге, Тасөткел су электр станциясында болды, «Тараз» химиялық паркі» перспективалық жобасымен танысты. Тасөткел су қоймасында қуаттылығы 9,2 МВт су электр станциясы 2013 жылы пайдалануға берілген. Оның құрылысына 1 млрд. 50 млн. теңге жұмсалса, 30 адам жұмыс орындарымен қамтамасыз етілген.

"Тараз химиялық паркі" Арнайы экономикалық аймағы аумағында 2020 жылға қарай 16 жуық кәсіпорын құрылмақ, инвестициялар көлемі 2,28 млрд. доллар. Осыған қоса, 2400 жуық жаңа жұмыс орындары ашылады деп күтілуде.

Жұмыс сапары барысында өңір басшысы «Шу-Жылу» КМК-ның орталық қазандық пен қалалық аурухана жұмысымен танысты.
Аймақ басшысы жұмыс сапарының соңында жиналыс өткізді, Шу ауданының әлеуметтік және экономикалық дамуы жағдайы қарастырылды.