Т. Дүйсенова Алматы тұрғындарына жаңа Еңбек кодексін түсіндірді

Сонымен қатар, азаматтық қызметшілердің еңбекақы төлеу жүйесіндегі өзгерістер туралы, 2016-2019 жылдарға арналған ҚР Денсаулық сақтау саласын дамытудың «Денсаулық» жаңа мемлекеттік бағдарламасы және әлеуметтік қамсыздандыру жайында айтып берді.

12 қараша күні Министр Дәрілік заттарды, медициналық мақсаттағы бұйымдарды және медицина техникасын сараптау ұлттық орталығына, Республикалық қан орталығына және Алматы онкологиялық орталығына барды.

Бүгін бюджеттік сала қызметкерлерімен кездесу кезінде Тамара Дүйсенова Алматы тұрғындарына 2015 жылдың 1 қаңтарынан бастап енгізілетін азаматтық қызметшілерінің еңбекақысын төлеу жүйесінің жаңа үлгісі туралы айтып берді. Аталған үлгіде азаматтық қызметшілерді біліміне, біліктілігіне, атқаратын қызметінің күрделілігі мен дәрежесіне қарай төрт санатқа бөлу көзделген: ұйымның даму стратегиясы үшін жауап беретін және басқару шешімдерін қабылдайтын басқарушы A блогы; ұйымның негізгі функцияларының іске асырылуын қамтамасыз ететін негізгі B блогы; әкімшілік-құқықтық және шаруашылық функцияларын орындайтын әкімшілік C блогы; қосалқы және техникалық функцияларды іске асыратын қосалқы D блогы.

Еңбекақы төлеу жүйесінің жаңа үлгісін енгізгеннен кейін біліктілігіне байланысты негізгі қызметкерлер жалақысының сараланып арттырылуы күтіледі:денсаулық сақтау саласында – 7% -дан 28%-ға дейін,білім беру саласында – 15%-дан 29%-ға дейін, өзге салаларда – 28%-дан 40%-ға дейін.

Сондай-ақ, қызметкердің білім, біліктілік деңгейіне, еңбек өтіліне және т.б. қарай өсім сараланатын болады.

Сондай-ақ, Тамара Дүйсенова ҚР Денсаулық сақтау саласын дамытудың 2016-2019 жылдарға арналған «Денсаулық» жаңа мемлекеттік бағдарламасы туралы да айтты.

Министр Қазақстанда эпидемиологиялық қызмет пен тамақтануды оңтайландыру, салауатты өмір салты қалыптастыруды біріктіру негізінде қоғамдық денсаулық сақтау саласы құрылатынын мәлімдеді.

Оның негізгі атқаратын қызметі: мінез-құлықтық қатерлердің, дұрыс тамақтанбау мен қоршаған ортаның әртүрлі жағымсыз факторларын азайту мен алдын алуға халықты жұмылдыру, олардың аталған жағдайлар туралы хабардарлығын арттыру; жұқпалы және негізгі жұқпалы емес аурулардың, оның ішінде психикалық ауытқулар мен жарақаттанушылықтың эпидемиологиялық бақылауын қамтамасыз ету; халықтың денсаулығын нығайту мен оны қорғауға бағытталған сектораралық өзара байланысты кеңейту және үйлестіру; эпидемиологиялық қауіпсіздік пен денсаулықты қорғау салаларындағы өзге де құқықтық нормалар мен заңнаманың сақталуын бақылауды қамтамасыз ету; аймақтық және ұлттық деңгейдегі аурулардың дамуын болжау және үлгісін қалыптастырудың халықаралық жүйесін енгізу.   

Медициналық көмекті ұйымдастыру жүйесіндегі орталық буын медициналық санитарлық алғашқы көмек (әрі қарай – МСАК) болады. Оның аясында тегін амбулаторлық емдеуге арналған дәрілік заттар тізімін кезең-кезеңімен ұлғайту жоспарланып отыр. МСАК-тың әмбебаптылығы әрі қарай адамның белгілі бір жас ерекшеліктерінің кезеңіне қарай ағзадағы өзгерістерін ескере отырып, аурулардың алдын алу басымдылығымен денсаулығын бақылауға негізделген өмір бойы  отбасылық қызмет көрсету қағидасына (әрі қарай – ОҚКҚ) көшу арқылы қамтамасыз етіледі. ОҚКҚ-ні аймақтың кадрлық қамтамасыз етілуіне байланысты жалпы практика дәрігерлері немесе учаскелік дәрігерлерден тұратын (терапевтер, педиатрлар, гинекологтар) мульти-тәртіптік топтар жүзеге асыратын болады. 

Сонымен қатар, транспорттық медицинаны, оның ішінде жедел медициналық көмек пен телемедицина, жылжымалы дәріханалық пункттерінің жүйесін әрі қарай дамыту көзделген.

Арнайы медициналық көмек барлық денсаулық сақтау саласының қызметтерімен біріктірілетін болады. Сонымен бірге негізгі әлеуметтік маңызы бар, жұқпалы емес аурулар мен елдің демографиялық ахуалына айтарлықтай әсері бар аурулар: миокардтың жіті инфаркті, мидағы қан айналымының ауыр ауытқулары (инсульт), қатерлі ісік аурулары, сынықтар, жүктілік және босандыру бойынша іс шаралар жоспарын жасау мен жүзеге асыру қарастырылған. Әрбір бағыт бойынша қызметтің барлық түрлері: алдын алу, емдеу шаралары, оның ішінде оңалту, диспансерлік бақылау, медициналық және әлеуметтік қызметтер көрсетілетін болады.

Жарна мөлшерлемесі мемлекет үшін сатылай өсетін болады: 2017 жылы 4%-дан 2024 жылы 7%-ға дейін, өзін-өзі жұмыспен қамтыған азаматтар жарнасының мөлшерлемесі (жеке кәсіпкерлер, жеке нотариустар, жеке сот орындаушылары, адвокаттар, кәсіби медиаторлар, азаматтық-құқықтық негіздегі келісім бойынша кіріс табатын жеке тұлғалар) 2017 жылы 2%-дан 2020 жылы 7%-ға дейін. Аталған жарналар жұмыс берушілер үшін корпоративті табыс салығын есептеу кезіндегі, қызметкерлер мен өзін-өзі жұмыспен қамтыған азаматтар үшін жеке табыс салығын есептеу уақытындағы шегерімге жатқызылатын болады.

ҚР Денсаулық сақтау саласын дамытудың 2016-2019 жылдарға арналған «Денсаулық» жаңа мемлекеттік бағдарламасының нәтижесінде 2020 жылға қарай Қазақстан Республикасы тұрғындарының өмір сүру ұзақтығы 73 жасқа дейін ұлғаятын болады.