Қазақстан мен Болгарияның мәдениет министрлігі ынтымақтастық туралы келісімге қол қойды
Келісімге қол қою рәсімі Болгария Республикасы Халық Жиналысының төрайымы Ц. Цачеваның Қазақстан Республикасына сапары аясында өтті.
Тараптар айтып өткендей, Қазақстан және Болгарияны тұрақты саяси сұхбат пен ынтымақтастықтың кең ауқымдары бойынша терең екіжақты байланыстарға негізделген берік достық қарым-қатынастары байланыстырады.
«Болгария Республикасы біздің дәстүрлі әріптесіміз болып табылады. Бұның айғағы ретінде болгар тарапының қазақстандық бастамаларға, соның ішінде 2010 жылы Еуропа қауіпсіздік және ынтымақтастық ұйымына төрағалығы, Бүкіләлемдік сауда ұйымы, БҰҰ Қауіпсіздік кеңесіне мүшелігі және Астанада EXPO-2017 халықаралық көрмесін өткізуге көрсеткен қолдауы болып табылады», - деді Ғ. Ахмедьяров.
Мәдениет саласындағы ынтымақтастық туралы келісім тарих және мәдениет ескерткіштерін сақтау, жаңғырту және консервациялау саласындағы екіжақты байланыстарды дамытуды қамтиды. Қазақстан және Болгария кітапханалары, мұражайлары, киноөнер және концерттің қызмет ұйымдары арасындағы әріптестік қатынастарды гүлдендіре түсуге ұмтылады.
Сонымен қатар, келісімге сәйкес, мемлекеттер бір-бірін екі жақ мүдделеріне тиесілі ақпаратпен алмасып отыратын болады. Тараптар келісімге қол қою екі мемлекет халықтарының арасындағы достық қарым-қатынастарды күшейту мен дамытуға жаңа серпін беретіндігіне сенім білдірді.
Құжатқа елдері атынан Қазақстан Республикасы мәдениет және спорт вице-министрі Ғалым Ахмедьяров пен Болгария Республикасы мәдениет министрінің орынбасары Бони Петринова қойды.
