«Нұрлы жол»: Алматы-Өскемен автожолының 53 шақырымы 2015 жылдың соңына дейін пайдалануға беріледі
10 Қараша, 2015 10:26
«Нұрлы жол» бағдарламасы аясында 2015 жылдың соңына дейін Алматы-Өскемен автожолының 53 шақырымы пайдалануға беріледі. Бұл туралы Strategy2050.kz АА-ға «ҚазАвтоЖол» ҰК» АҚ хабарлады.
«Қапшағай – Талдықорған учаскесінде Сарқанд қаласын айналу арқылы жүзеге асырылып жатқан 157 шақырымдық Алматы-Өскемен жобасы бойынша құрылыс жұмыстары жүргізілуде», - деп хабарлады ведомство.
Жылдың қорытындысы бойынша 53 шақырымды пайдалануға беру жоспарланып отыр. Қалған 104 шақырымы 2016 жылы аяқталады.
Сондай-ақ, 2015 жылдың мамырында Ақтөбе-Мақат учаскесінің ТЭҚ-і әзірленуде, ал Астана-Қарабұтақ, Атырау-Астрахань учаскесін әзірлеуге байқау жарияланды.
Құрылыс жұмыстарын 2016 жылы бастап, 2019 жылы аяқтау қарастырылып отыр.
Индира Кауметова
