Қазақстан мен Қытайдың әскери қызметшілері бірлескен арнайы операцияны орындады (ФОТО)

9 Қараша, 2015 19:56

Қазақстандағы «Көктал» оқу-жаттығу полигонында «Антитеррор-2015» халықаралық оқу-жаттығуы аяқталды. Оған Қазақстан Қарулы Күштерінің Аэроұтқыр әскерлерінен 500-ге жуық әскери қызметші және Қытай Халық Республикасынан 70 адам, шамамен 83 бірлік әскери және арнайы техника, шамамен 9 бірлік маңдайшептік авиация ұшақтары мен армиялық авиация тікұшақтары тартылды, деп хабарлады Қорғаныс министрлігінің баспасөз қызметі.

Оқу-жаттығу ҚР ҚК Аэроұтқыр әскерлерінің қолбасшысы генерал-майор Алмаз Жұмакеевтің басшылық етуімен өтті. Ниетке сәйкес Алматы облысының шығыс аудандарына заңсыз бандқұралым енді.

Осыған байланысты, шартты түрде төтенше жағдай енгізілді, мемлекеттік шекараны күшейту, заңсыз құралымның іс-қимыл аудандарын оқшаулау және оны бейтараптандыру мақсатында бірлескен лаңкестікке қарсы операцияны өткізу жөнінде «Оңтүстік-Шығыс» жедел қолбасшылығы құрылды.

ҚР Аэроұтқыр әскерлері мен Қытайдың Ұлт-азаттық армиясының бөлімшелері дабыл бойынша көтерілді, жауынгерлік әзірлікке келтірілді және оңтүстік-шығыс бағытқа қайта топтастырылды. Барлық оқу-жаттығу алты тактикалық эпизод шеңберінде өрістетілді. Алдымен парашюттік және қондыру тәсілдерімен десанттау.

Содан кейін арнайы мақсаттағы рота бөлімшелері топтары (антитеррор) мен Қытайдың Ұлт-азаттық армиясы бөлімшелерінің белгіленген аудандарда орналасуы, іздестіру іс-қимылдарын жүргізу, тікелей жауынгерлік іс-қимылдар және жауынгерлік іс-қимылдар ауданынан антитеррор бөлімшелерін көшіру.

Аталған бірлескен оқу-жаттығудың мақсаты өзара түсінушілік пен сенімділікті нығайту, тәжірибе алмасу және армиялар арасында ынтымақтастық жасау, лаңкестікпен күресуде екі елдің Қарулы Күштерінің жедел үйлесімділігін арттыру болып табылатынын айта кеткен жөн. «Антитеррор-2015» бірінші бөлігі ағымдағы жылғы қазанның соңында ҚХР Синьцзян-Ұйғыр автономдық ауданында «Қорла» оқу-жаттығу орталығының базасында өтті.

Барлық жаңалықтар