Жалдаушылар ауыл шаруашылығы мақсатындағы жерлерді жеңілдікпен сатып ала алады

9 Қараша, 2015 16:21

Қазақстанда жалдаушылар үшін ауыл шаруашылығы мақсатындағы жер телімдерінің кадастрлық құны өзгермейді, деп хабарлады ҚР Ұлттық экономика вице-министрі Қайырбек Өскенбаев ӨКҚ-да өткен «Ауыл шаруашылық міндеттегі жерлерді пайдаланудың және жер кодексіне енгізілген түзетулердің ерекшеліктері туралы» баспасөз мәслихатында.

ҚР Парламентінің Сенаты «Жер кодексіне өзгертулер мен толықтырулар енгізу туралы» заң жобасын мақұлдады. Заң жобасының мақсаты ауыл шаруашылығы мақсатындағы жерлердің тиімді және мақсатты тұрғыда пайдалануын қамтамасыз ету. Заңның жобасы Ұлт жоспарының 35,36 қадамын жүзеге асыруға бағытталған.

Жер кодексіне мынадай түзетулер енгізілді: аукцион арқылы ауыл шаруашылығы мақсатындағы жерлерді жекеменшікке алу; жер телімдерін сатып алуға жеңілдіктер беру; жалға берілген ауыл шаруашылығы мақсатындағы жерлер бойынша шектеулерді алып тастау.

Вице-министр атап өткендей, Қазақстанда жалдаушылар үшін ауыл шаруашылығы мақсатындағы жер телімдерінің кадастрлық құны өзгермейді.

«Мемлекет тарапынан бұл дұрыс болмайды. Төлқұжаттарда жердің кадастрлық құны көрсетілген», - деп түсіндірді Қ.Өскенбаев.

Ботагөз Айтжанова