«Атамекен» ҰКП жұмыссыздық мәселесін шешуге арналған бағдарламаны жасақтады

9 Қараша, 2015 14:26

«Атамекен» ұлттық кәсіпкерлер палатасы арнайы кәсіпорындар үшін жұмысшыларды оқыту бағдарламасын жасақтады, деп хабарлады «Атамекен» ҚР ҰКП басқарма төрағасының орынбасары Нұржан Алтаев ОКҚ-да.

«Қазіргі таңда бұл тек жоба ғана, әзірге дайын механизм деп айта алмаймын. Осы тұрғысында жұмыс істеп жатырмыз. Біз мемлекеттік органдарға біздің Кәсіпкерлерге қолдау көрсету орталықтарымыз кәсіпорындар тапсырысын ұстау керек деген қызметті ұсындық. Яғни олар қайда қандай мамандар жетіспейтінін білуі керек. Мысалы бір фермерлі шаруашылықта 5 комбайншы жетіспей жатыр, оны КҚКО білуі керек, біз әрқашан Жұмыспен қамту орталықтарымен ақпарат алмасып отыруымыз керек. Мәселен, шахта жабылып қалды делік, біз оған жұмысшысы 6-8 айда қайта оқып, комбайншы жұмсысына орналасуды ұсынатын боламыз», - деді Н.Алтаев.

Осылайша, ұлттық палата жұмыссыздарды қайта оқытуды және оларды бар жұмысқа жіберуді ұсынып отыр.

«Жұмыспен қамту бағдарламалары арқылы бізде қыруар қаржы бөлініп отыр. Біз орталықтарымызды бір терезе іспетті пайдалануды ұсынып отырмыз. Жұмыспен қамту орталықтарының байланысы өте жақсы емес және олар толығымен қамтымайды. Олар қай кәсіпорынға қандай мамандар керек екенін біле бермейді. Ал, біз болсақ жұмыссыз жандарды нақты бір кәсіпорын үшін қайта оқытып, сол жаққа жұмысқа жіберетін боламыз», - деп түсіндірді ол.

Ол атап өткендей, бүгінде аталмыш жоба ҚР Денсаулық сақтау және әлеуметтік даму министрлігінде талқылау барысында.

Анар Тәңірқұлова