Ақмолалық спортшылар бокстан өткен халықаралық турнирде 2 қола медаль иеленді (ФОТО)
9 Қараша, 2015 20:43
Ақмола облысының спортшылары Қаракөз Абдаллаевтың құрметіне орай бокстан өткен халықаралық турнирде 2 қола медаль иеленді, деп хабарлады облыстық ІСБ жанындағы «Ақмола Медиа Орталығы».
Халықаралық турнир Шымкентте аяқталды. Дүбірлі додаға Қазақстан, Өзбекстан, Ресей, Тәжікстан мен Қытай елдерінен келген 150-ге жуық боксшы қатысты. Ағымдағы жылы КСРО-ның еңбегі сіңген жатықтырушысы Қаракөз Абдаллаевтың құрметіне өткен жарыс осымен 36-рет ұйымдастырылды. Бес күн бойын жас спортшылар 10 түрлі салмақ дәрежесі бойынша өзара бақ сынады.
Ақмола облысының намысын 3 спортшы қорғады, оның ішінде екеуі қола медаль иеленді. Атап айтар болсақ, олар жаттықтырушы Анатолий Пермяковтың тәрбиеленушілері Архат Кемелбаев (60 кг) пен Жандос Хайруллаев (75кг).
«Турнир жоғары деңгейде өтті. Шаршы алаңында барлық ұрыс тартысты өтті. Бокс державасы ретінде біздің спортшыларымыз намысты қолдан бермеді», - деп атап өтті А. Пермяков.
