• Басты
  • ҚР халық жазушысы Ә.Нұрпейісов қызылордалық оқырмандармен кездесті (ФОТО)

ҚР халық жазушысы Ә.Нұрпейісов қызылордалық оқырмандармен кездесті (ФОТО)

9 Қараша, 2015 10:18
Қызылордада Қазақстанның халық жазушысы Әбдіжәміл Нұрпейісовпен оқырмандардың кездесу кеші өтті, деп хабарлады Қызылорда облысының әкімдігі.

Шараға облыс әкімі Қ.Көшербаев, зиялы қауым өкілдері, ақын-жазушылар, мәдениет қызметкерлері мен студент-жастар қатысты. Кешті филология ғылымдарының докторы, әдебиеттанушы ғалым Бағдат Кәрібозов жүргізді.

Естеріңізге сала кетейік, Әбдіжәміл Нұрпейісов 1924 жылдың 22 қазанында Қызылорда облысы  Арал ауданы Құланды поселкесінің Үшкөң ауылында дүниеге келген. Қазақ руханиятына үлкен үлес қосқан қаламгер шығармалары бүгінде қазақ әдебиетінің бай мұралары болып саналады. 

Жазушының тұңғыш шығармасы – Ұлы Отан соғысы тақырыбына арналған «Курляндия» романы 1950 жылы жарық көрген. Бұл шығармасы үшін жазушыға Жамбыл атындағы республикалық сыйлық берілген. «Курляндия» романы кейіннен өңделіп, толықтырылып, 1958 жылы «Күткен күн» деген атпен қайта жарияланған. «Қан мен тер» трилогиясы және «Сең», «Соңғы парыз» романдары дүниежүзі халықтарының көптеген тілдеріне аударылған. «Қан мен тер» трилогиясы орыс, француз, испан, чех, румын және түрік тілдеріне тәржімаланған. Бүгінгі кездесу кешіне келген кітапсүйер қауым үшін мәдениет үйінде жазушының туындылары қойылған көрме ұйымдастырылды.

«Мен 92 жасқа аяқ бастым. Бүгін елге келіп, жерлестеріммен, оқырмандарыммен кездесіп отырғаныма өте қуаныштымын. Әсіресе, кездесуге жастардың көп келгені көңілге қуаныш ұялатады. Сондықтан осы жастарға адал болыңдар, көп оқып, алған білімдеріңізді ел игілі үшін жаратыңдар дегім келеді. Кеш барысында көкейлеріңде жүрген сауалдарың болса, мен жауап беруге дайынмын», - деді жазушы Ә. Нұрпейісов.

Барлық жаңалықтар