9 Қараша, 2015 08:56
АСЕМ СІМ басшылары Астанада өтетін ЭКСПО-2017 қолдайтындарын жеткізді
2015 жылдың 5-6 қарашасында Люксембург қаласында «Азия - Еуропа» форумының (АСЕМ) сыртқы істер министрлерінің 12-ші отырысы өтті. Келелі кеңеске азиялық және еуропалық елдердің 50-ден астам сыртқы саясат ведомстволарының 50-ден астам басшылары қатысты. Оның ішінде ЕО сыртқы істер мен қауіпсіздік саясаты бойынша Жоғарғы өкілі Федерик Могерини, Германия, Швейцария, Испания, Венгрия, Жапония, Индонезия, Моңғолия, Корея республикасы елдерінің және т.б. сыртқы істер министрлері бар.
Қазақстандық делегацияны сыртқы істер министрінің орынбасары – ҚР Президентінің арнайы елшісі Алексей Волков бастап барды, деп хабарлады ҚР СІМ.
Қатысушылардың алдында сөз сөйлеген Люксембургтың Ұлы герцогы Анри, АСЕМ заманауи қауіп қатерлерді талқылаудың және оларға қарсы шараларды жасақтаудың бірегей халықаралық алаңы деп атап өтті.
Кездесу барысында АСЕМ-ге мүше мемлекеттердің делегация басшылары климаттың жаһандық өзгеруін, төтенше жағдайларды басқару әдістерін, сонымен қатар Форум аясында мемлекеттердің өзара қарым-қатынас болшағын талқылады.
Жалпы, АСЕМ СІМ басшылары Астанада өтетін ЭКСПО-2017 қолдайтындарын жеткізді.
