Калачи ауылының 24 отбасына жаңа пәтер кiлттерi табысталды (ФОТО)

7 Қараша, 2015 14:03

Калачи ауылынан тағы 24 отбасы көштi. Есiл қаласында 45 пәтерлi көп қабатты үй пайдалануға берiлiп, ол жерде 24 отбасы көшуге тiлек бiлдiрдi. Қоныстанушыларға жаңа пәтерлердiң кiлттерiн аудан әкiмi Аманбек Қалжанов табыстады, деп хабарлады облыс әкімдігі.

4 қабатты тұрғын үй «Жұмыспен қамтудың жол картасы — 2020» мемлекеттiк бағдарламасы аясында Калачи ауылы және Красногорск поселкесi тұрғындарын көшiру үшiн бөлiнген қаражатқа салынған.

Пәтер кiлтiн алғандардың бiрi Рязапова Найляның қуанышында шек жоқ. Оның отбасы екi пәтерлi үйге ие болды. «Бiз жер үйде тұрдық, күн сайын су тасып, от жағу керек болатын. Ауылда ешқандай болашақа жоқ, ең бастысы өз денсаулығымыз үшiн алаңдап өмiр сүрдiк. Бiзге Есiл қаласынан үй бергенi өте қуанышты. Пәтерiмiз бiзге ұнады. Жылы. Ендi бөлмелерге өз қалауымызша жөндеу жасап аламыз да қараша айының ортасына дейiн көшемiз» — дейдi ол қуанышын жасыра алмай.

Зейнеткер Анна Андрееваға бiр бөлмелi пәтер бұйырыпты. Ол үйдiң жылылығын, әдемiлiгiн, бiрiншi қабатта екендiгiн, яғни өзiне ыңғайлылығын айтты. «Осындай бiзге қиын кезеңде қолдау бiлдiргендерi үшiн алғысымызды айтамыз» — дедi ол.

Жаңа үйлердегi пәтерлер заманауи жобамен тұрғызылған. Бөлмелер кең, санитарлық торап бөлiнген. Аула асфальтталып, жарықтандырылған, көлiк қоятын орын жасақталған. Әр кiре берiстерге темiр есiктер мен домофондар орнатылған. Болашақта бұл жерде стадион мен балалардың ойын алаңқайларын тұрғызу жоспарлануда. Ал қазiр дүкен, мектеп, балабақша үйден алыс емес.

Еске сала кетейiк, биылғы жылдан бастап ҚР Үкiметiнiң қолдауымен облыс басшылығы Калачи ауылының және Красногорск поселкесiнiң тұрғындарын өңiрдiң өзге аумақтарына көшiру туралы шешiм қабылдаған болатын. Бүгiнгi күнi бұл ауылдардан 84 отбасы (218 адам) көшiрiлген. Аталмыш ауыл тұрғындарын көшiру тек тұрғындардың келiсiмi бойынша жалғасуда.

Барлық жаңалықтар