Ақтөбеде екі жаңа балабақша ашылды
Балабақшалардың ашылу салтанатына Ақтөбе қаласының әкімі Бекбол Сағын қатысты.
Іс-шара барысында қала әкімі Бекбол Сағын қатысушыларды шын жүректен қаламыздағы екі мектепке дейінгі ұйымның ашылуымен құттықтап, балаларды мектепке дейінгі тәрбиемен және оқытумен толыққанды қамту мәселесі бойынша Елбасы жүктеген тапсырмасы бойынша ең маңызды әлеуметтік мәселелерді жүзеге асыру мақсатында балабақшалар құрылысының маңыздылығын атап өтті. 150 орынға арналған № 48 жаңа мектепке дейінгі ұйымы Заречный-1 тұрғын массивінде тұрғызылған. Құрылысты «Кварц спец сервис» ЖШС мердігер компаниясы жүргізген. Жалпы аумағы - 6480,0 шаршы метрді құрайды. Балабақша құрылысына бюджеттен 362,3 млн. теңге бөлінді. Балабақша 6 топқа есептелген.
Балабақша құрылысының орны Заречный-1 ауданындағы, соның ішінде Заречный-2, Заречный-3 және т.б. аудандарында мектепке дейінгі ұйымдардың жетіспеушілігінен таңдап алынды.Сонымен қатар дәл осы күні 11 мөлтек ауданында орналасқан 230 орындық № 49 «Думан» МДҰ-ның салтанатты ашылуы өткізілді.
Кезінде бұл типтік үлгідегі балабақша, содан кейін аталған ғимаратта ұзақ мерзім физика-математика мектеп-интернаты орналасты. Мұндай әлеуметтік нысанның ашылуы 11 мөлтек ауданының кішкентай және үлкен жастағы тұрғындары үшін маңызды оқиға екендігі сөзсіз.
Қайта қалпына келтіру жөніндегі құрылыс-монтаж жұмыстарын «Элит Строй Сервис» ЖШС-і жүргізді. Жалпы аумағы – 3621,6 шаршы метр. Балабақшаның сметалық құны 238,247 млн. теңге. Балабақша 10 топқа есептелген.
Жаңа балабақшаларда қазіргі заманғы қажетті құралдармен жабдықталған музыка және дене шынықтыру залдары, ойын және ыңғайлы жатын бөлмелері қарастырылған. Бұл жерде балаларды тәрбиелеу және оқыту үшін барлық жағдайлар жасалған.
Қалалық білім бөлімінің басшысы Л.Оразбаеваның мәлімдеуінше, қазіргі таңда Ақтөбе қаласында 49 мемлекеттік балабақша, 33 жеке балабақша бар, мектеп жанынан ашылған 21 шағын орталықта 20700 бала тәрбиеленуде. Ағымдағы жылдың желтоқсан айында «Нұр Ақтөбе» шағын ауданында 320 орындық балабақшаның ашылуы жоспарлануда.
