Павлодарда мүмкіндігі шектеулі жандарға арналған балабақша ашылды

5 Қараша, 2015 10:42

Павлодарда денсаулығы жағынан мүмкіндігі шектеулі балаларға арналған №52 арнайы балабақша ашылды, деп хабарлады облыс әкімдігінің баспасөз қызметі.

Ғимаратты өткен жылы облыс әкімі Қанат Бозымбаевтың тапсырмасы бойынша «Нұр Отан» партиясы коммуналдық меншікке қайтарып алған болатын. Мектепалды ұйымды қалпына келтіру ісі мемлекеттік-жеке меншік серіктестік аясында «ERG КӨМЕК» компаниясымен жүзеге асырылды.

«Бұл балабақшаның ашылуы осы санаттағы бүлдіршіндеріміз үшін қосымша 70 орын құруға мүмкіндік берді»,- деп атап өтті №52 арнайы балабақшаның ашылу салтанатына қатысқан аймақ басшысы.

Балабақшада топтық және жатын бөлмелер, медициналық блок, ас әзірлеу блогы, кір жуу орынжайы, музыка және спорт залдары жабдықталған, сондай-ақ аумағы абаттандырылып, балаларға арналған ойын алаңдары орнатылған.

Облыс әкімі Қанат Бозымбаев балабақшаға спорт жабдығын сыйға тартты.

Қазіргі уақытта облыста 164 балабақша, 268 шағын орталық жұмыс істеп тұр, оларда 38 мыңнан астам бала тәрбие алуда. Жаңа балабақша іске қосылғалы 1-6 жастағы балаларды мектепалды біліммен қамту 73,1%-ды құрады, ал 3-6 жас аралығындағы балалар балабақшадағы орынмен толықтай қамтылған.

Оның ішінде 5 арнайы балабақшада және 6 жалпы үлгідегі балабақшада 670 ерекше бала білім алып жатыр.