Ұлыбритания халықаралық ЭКСПО-2017 көрмесіне қатысу келісімшартына қол қойды

4 Қараша, 2015 18:13

Ұлыбритания халықаралық мамандандырылған ЭКСПО-2017 көрмесіне қатысу келісімшартына қол қойды, деп хабарлады Ұлттық компанияның баспасөз қызметі.

Бұл туралы Лондон қаласында Қазақстан Республикасы Президенті Н.Назарбаев пен Ұлыбритания Премьер-Министрі Д.Кэмеронның қатысуымен өткен Қазақстан-Британ үкіметаралық сауда-экономикалық ынтымақтастық комиссиясының ІІ отырысында белгілі болды.

Келісімшартқа «Астана ЭКСПО-2017» ҰК» АҚ Басқарма Төрағасы Ахметжан Есімов пен Ұлыбритания ұлттық секциясының комиссары Чарлз Хендри қол қойды.

Осы келісімшарт арқылы Ұлыбритания ЭКСПО-2017 көрмесіндегі ең үлкен павильондардың бірін (1022 кв.м) алып, қайда орналасатындықтарын анықтады. Сонымен қатар, ендігі уақытта британдықтар павильондарының ішкі мазмұны бойынша жұмыстарын бастап кетті.

Айта кету керек, бүгінгі таңда 51 мемлекет пен 11 халықаралық ұйым ЭКСПО көрмесіне қатысатындығын ресми растады.