Солтүстік Қазақстанда жаңа мешіт ашылды
4 Қараша, 2015 20:42
Айыртау ауданының Қарасай батыр ауылында мешіттің құрылысы аяқталды. Салтанатты ашылу рәсіміне СҚО әкімі Ерік Сұлтанов, Қазақстан мұсылмандар одағының төрағасы, Бас муфти Ержан қажы Малғажы ұлы, қоғам қайраткерлері, аудан тұрғындары қатысты, деп хабарлады аймақ әкімдігі.
Өз сөзінде әкім атап өткендей, конфессияаралық келісім еліміздің мемлекеттік саясатының маңызды бағыты.
«Бұл мешіттің ашылуы Қазақ хандығының 550 жылдығы аталып өтіп жатқан жылы айтулы оқиға. Бұл жерде Шоқан Уалихановтың балалық шағы өтті, мұнда Ақан сері, Үкілі Ыбырай, Орынбай сынды халық ұлдары дүниеге келді. Өскелең ұрпақ ата-бабаларымыздың салт-дәстүрын білуі және сақтап қалуы керек. Бұл ретте рухани-адамгершілік тәрбие басты роль атқарады», — деді Ерік Сұлтанов.
Ержан қажы Малғажы ұлы ауыл тұрғындарын жаңа мешіттің ашылуымен құттықтап, бұл мұсылман қауымның өміріндегі айтулы оқиға екенін атап өтті.
Айыртау ауданының Қарасай батыр ауылындағы мешіт 100 адамға есептелген. Мешіттің жалпы ауданы 196 шаршы метр және биіктігі 11 метр.
