3 Қараша, 2015 12:59

Қытай «Қорғас – Шығыс қақпасы» аймағын дамытуға 600 млн доллар инвестиция бағыттайды

Қытай беретін 600 млн доллар инвестиция «Қорғас – Шығыс қақпасы» арнайы экономикалық аймағының индустриялық аймағын құруға бағытталады. Бұл туралы бүгін Орталық коммуникациялар қызметінің баспасөз мәслихатында «Қазақстан темір жолы» ұлттық компаниясының көлік логистикасын дамыту орталығы директорының орынбасары Әбдір-Рашид Сәкенов мәлім етті.

«600 млн долларға ынтымақтастық меморандумы жасалған болатын. Бұл инвестицияны Цзянсу провинциясы бөледі. Қаражатты логистикалық және индустриялық аймаққа жұмсауды жоспарлап отырмыз. Қытай шикізатты импорттауға мүдделі, яғни біздің шикізат Қазақстан аумағында бастапқы өңдеуден өтеді. Әрі қарай ол қоймаларда қапталады немесе контейнерлерге, вагондарға салынып, Қытайға жөнелтіледі», - дейді Ә.Сәкенов.

Айта кетейік, «Қорғас – Шығыс қақпасы» арнайы экономикалық аймағы мен ШЫҰ-ның халықаралық логистикалық аймағы жобаларын дамыту бойынша стратегиялық ынтымақтастық келісіміне қыркүйекте Қазақстан Президентінің Қытайға мемлекеттік сапары барысында қол қойылған болатын.

«Қорғас-Шығыс қақпасы» АЭА негізгі мақсаттарының бірі Қазақстан Республикасының сауда-экспорттық қызмет қызығушылықтары мен транзиттік әлеуетін қамтамасыз ететін, сонымен қатар іргелес мемлекеттермен экономикалық және мәдени алмасуын дамытуға болысатын тиімді көліктік-логистика және индустриялық орталық құру.

Ботагөз Айтжанова

Құжатқа сай Қытай тарапы 5 жыл ішінде «Қорғас – Шығыс қақпасы» арнайы экономикалық аймағын дамытуға 600 млн АҚШ доллары көлемінде тікелей инвестиция бағыттайды.

Барлық жаңалықтар