Павлодар облысында 108 отбасы баспанаға қол жеткізді

3 Қараша, 2015 15:03

Аймақтарды дамытудың 2020 жылға дейінгі бағдарламасы» аясында «Қазақстанның тұрғын үй құрылыс жинақ банкі» АҚ салымшылары мен жалгерлік тұрғын үйге кезекте тұрған азаматтарға 108 пәтер берілді, деп хабарлады облыс әкімдігінің баспасөз қызметі.

Жаңадан қоныстанушыларға пәтерлердің кілттерін Павлодар облысының әкімі Қанат Бозымбаев табыстады.

«Бұл оқиға – Елбасының қазақстандықтардың өмір сапасын арттыруға бағытталған саясатының нақты іске асырылуы. Ағымдағы жылдың соңына дейін Толстой, 96 мекенжайында және Гагарин-Ворушин көшелерінің қиылыстарында орналасқан тағы екі үйді пайдалануға беруді жоспарлап отырмыз. Қаламыздың 144 тұрғыны жаңа баспанаға қол жеткізеді»,- деп атап өтті аймақ басшысы.

«ГСУ Құрылыс» ЖШС 770,0 млн. теңге сомасына Сибирская 87/2 мекенжайында орналасқан 9 қабатты 3 подъезді жалпы аумағы 6278,0 шаршы метрді құрайтын тұрғын үйді салды.

«Аймақтарды дамытудың 2020 жылға дейінгі бағдарламасы» бойынша тұрғын үй құрылысының келесі бағыттары іске асырылуда: ТҚЖБ жүйесі арқылы берілетін кредиттік тұрғын үй, жергілікті атқарушы органдар арқылы кезекте тұрған азаматтарға берілетін жалгерлік тұрғын үй, жас отбасыларға арналған жалгерлік үй, коммерциялық тұрғын үй, «ҚИК» АҚ арқылы берілетін тұрғын үй және жеке тұрғын үй құрылысы.

Барлық жаңалықтар