Елордада қар тазалауға 2 мыңға жуық адам мен 520 техника бірлігі жұмылдырылды
2 Қараша, 2015 15:49
Астанада таңертеңнен бері қар жаууда. Елордалық коммуналдық қызмет өкілдері қала көшелерін қардан тазалау бойынша екі ауысымда және тәулік бойы жұмыс істеуде. Барлық қала аумағында 1955 жұмысшы мен 520-дан астам мамандандырылған техника қар тазалау жұмыстарына тартылған, деп хабарлады қала әкімдігінің ресми сайты.
Жұмысшылар мен бөлінген мамандандырылған техника көлемі автожолдардың көлеміне қарай өзгертіледі. Атап айтқанда, Кенесары, Керей-Жәнібек хандар, С. Сейфуллин және Республика даңғылы секілді үлкен көшелерді қардан тазалау жұмыстарына ең көп көлемде жұмысшы мен коммуналдық көлік тартылған.
Бүгінгі таңда мердігер мекемелердің күшімен қала аумағынан он мың текше метрден астам қар шығарылды, сонымен қатар, мыңнан астам құм-тұз қоспасы жолдарға себілген.
Астана қаласы Коммуналдық шаруашылық басқармасы көлік жүргізушілерін жолда мұқият болуға, қар тазалау техникаларына кедергі келтірмеуге, көліктерді жол бойында қалдырмауға шақырады.
