Академияда Ресей Федерациясының 40 мемлекеттік қызметшілерінің халықаралық тағылымдамасы басталды

Ашылу салтанатында Мемлекеттік басқару академиясының ректоры Болатбек Абдрасилов, ҚР Президенті Әкімшілігінің Бөлім меңгерушісі Марат Дәуешов, ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің департамент директоры Әли Көмекбаев қатысты.

Алғаш рет өткізіліп отырған бұл тағылымдаманы ҚР Президентінің жанындағы Мемлекеттік басқару академиясы РФ Президенті жанындағы Ресей халық шаруашылығы және мемлекеттік қызмет академиясымен бірлесіп, ұйымдастырды.

Тағылымдама бағдарламасына Ресей Федерациясының 24 өңірінен, атап айтқанда федералдық деңгей, Федерация субъектілері мен Мәскеу қ., Татарстан Республикасы, Дағыстан, Ингушетия, Краснояр өлкесі, Камчатка өлкесі, Владимир, Брянск облыстарынан келген 40 мемлекеттік қызметші–жастар қатысады.

Тағылымдама бағдарламасы ресей тарапының сұранысы бойынша құрастырылған және Қазақстан Республикасының әлеуметтік-саяси және әлеуметтік-экономикалық дамуымен, ауыл шаруашылығын қолдау бағдарламасымен, этносаралық қатынастар саласында мемлекеттік және азаматтық институттардың өзара іс-қимыл практикасымен, елорда – Астана қаласының даму келешегімен таныстыруды көздейді.

Екі апталық оқыту барысында лекциялар мен практикалық сабақтарды Қазақстан Республикасы Президенті Әкімшілігінің, ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің, Қазақстан халқы Ассамблеясының, Мемлекеттік басқару академиясының өкілдері, ұлттық экономика, инвестициялар мен даму, білім және ғылым, денсаулық сақтау және әлеуметтік даму, ауыл шаруашылығы министрліктерінің жауапты қызметкерлері, сондай-ақ «Атамекен» ҰКП, «Қазагро» Ұлттық басқарушы холдингінің, «Даму» Қорының, «Экономикалық зерттеулер институты» АҚ және басқалардың жетекші сарапшылары жүргізеді.

Бұдан өзге, Қазақстан Республикасы Парламенті Сенатының депутаттарымен кездесулер және Астана қаласының әкімдігі мен Халыққа қызмет көрсету орталықтарында көшпелі сабақтар өткізу жоспарланған.