Астананың жұмыспен қамту орталығы 4500 адамды жұмыспен қамтыды

2 Қараша, 2015 12:43

2015 жылдың 10 айында Астана қаласында шамамен 4 500 жұмыссыз азамат жұмысқа орналастырылды. Бұл жөнiнде ҚР Президентi жанындағы Орталық коммуникациялар қызметiнде өткен баспасөз мәслихатында Астана қаласы әкiмдiгi Жұмыспен қамту орталығының директоры Олжас Омар мәлiмдеді.

«Жұмыспен қамту орталығының көмегiне жыл басынан берi 10 мыңға жуық адам жүгiнген. Оның iшiнде шамамен 4500 азамат жұмысқа орналасты, яғни, әрбiр екiншi тұрғын жұмыспен қамтылды Ал тиiстi бiлiктiлiгi жоқ адамдарға бiз қайта даярлаудан өткiзетiн оқуды ұсындық. Осындай қайта даярлау курсына биылғы жылдың он айында 627 адам жiберiлдi», - деді Олжас Омар.

«Жоғары және орта кәсiби бiлiмi бар түлектер үшiн бiз ақысы төленетiн жастар тәжiрибесiнен өтудi ұсынамыз. Осы жылы шамамен 585 адам жастар тәжiрибесiне жiберiлдi. Айына 40 мың теңгенi мемлекеттiк жұмыспен қамту орталығы төлейдi. Халықтың мақсатты топтарын жұмысқа орналастыру үшiн әлеуметтік жұмыс орындарына жұмысқа орналастырудың бағдарламасы бар. Яғни, бұл жұмыс берушiге еңбекақыны субсидиялау», - дедi орталық директоры.

О.Омар жұмыссыздарды, сонымен қатар, уақытша жұмыстарға, яғни, ақысы төленетiн қоғамдық жұмыстарға да жiберiлетiнiн айтты. Биыл 1700 адам осындай жұмыстарға жiберiлген.

«Бiлiм алып жатқан жастар үшiн де қосымша қаражат көзiн табу шарасы қарастырылған. Яғни, олар жарты күн жұмыс iстесе, жарты күн бiлiм алады. Осы жылы шамамен 1500-ге жуық адам осындай шарамен қабылданды. Жұмыспен қамту орталығы бос орындар жәрмеңкесiн де тұрақты өткiзiп тұрады. Осы жылы мұндай 12 жәрмеңке ұйымдастырылды», - деген ол бос орындар жәрмеңкесi адамдар көп шоғырланған сауда үйлерi, бекеттер, базарлар, оқу орындары, мектептер секiлдi жерлерде өткiзiлетiнiн айтты.

Барлық жаңалықтар