ЭКСПО Халықаралық көрмесінің туы Астанаға жеткізілді

2 Қараша, 2015 09:21

Италиядағы «EXPO MILANO-2015» Халықаралық көрмесінің ресми жабылу салтанатында ЭКСПО-ның туы ресми түрде Қазақстанға табысталды.

Туды ХКБ Бас хатшысы Висенте Лоссерталес пен ЭКСПО-2015 Бас Комиссары Бруно Паскуинодан «Астана ЭКСПО-2017» Ұлттық компаниясы» АҚ Басқарма төрағасы Ахметжан Есімов пен ЭКСПО-2017 Комиссары Рәпіл Жошыбаев қабылдап алды.

Миландағы «ЭКСПО-2015» Халықаралық көрмесіне 21 миллионға тарта адам қатысты. Бұған дейін хабарлағанымыздай, Қазақстанның ұлттық павильоны «Тақырып пен контентті үздік ашу» номинациясында үздік үштікке ілінген болатын.

Естеріңізге саламыз, 2017 жылы ЭКСПО Халықаралық көрмесі Қазақстан астанасында өтеді. Бұл 2012 жылдың 22 қарашасында Халықаралық көрмелер бюросының 152-Бас Ассамблеясында ХКБ-ға мүше 161 мемлекеттің жасырын дауыс беруі арқылы шешілді. Астананы қолдап, 103 мемлекет дауыс берді.

Шараны Халықаралық көрмелер бюросы (ХКБ) ұйымдастырады.

Көрмеге 100-ден аса мемлекет, 10 артық халықаралық беделді ұйым мен инновациялық технологиялар саласындағы көшбасшы компания қатысады деп күтілуде.

Суретке түсірген Бауыржан Жуасбаев