Елбасы Н.Назарбаев жаңа ҚР Азаматтық іс жүргізу кодексіне қол қойды

«Мен сәуір айында жариялаған «5 реформа», «100 нақты қадам» деген тапсырма бар. Сол жөнінде Парламент жұмыс істеп, 59 заңнаманы қабылдауы қажет. Бұл жұмыс қазір қауырт істеліп жатыр. Сол заңдардың ішіндегі 16 Заңға мен қол қойып үлгердім. Қазіргі қол қояйын деп отырғаным 17-ші заң. Бұл жоспардың маңызды бағыттарының бірі заңның үстемдігін қамтамасыз ету деген тәртіп бар. Жаңа кодексті қабылдау арқылы осы міндетті орындауға кірісеміз», - деді мемлекет басшысы.

Н.Назарбаев атап өткендей, жаңа Азаматтық іс жүргізу кодексі құқық саласын түбегейлі жақсартатын болады.  

«Азаматтық іс жүргізу кодексіне еліміздің құқықтық жұмысын әлемдік стандарттардың озық деңгейіне жеткізетін өзгерістер енгізілді. Біріншіден, Қазақстан жаңа жылдан бастап 5 буынды сот жүйесінен 3 буынды сот жүйесіне көшетін болады. Екіншіден, инвестициялық дауларды қараудың жаңа тәртібі енгізіледі. Сол арқылы елімізде жаңа жағдайда экономикалық даму үшін маңызды рөл атқаратын инвестициялық тартымдылығы арта түседі», - деп толықтырды ҚР Президенті.

Сонымен қатар, құжат азаматтық сот жүргізу ісінде ақпараттық технологиялар кеңінен қолданылады. Соттың атқарып жатқан жұмысы барлық ел үшін жариялы болады. Бұл жағдай сот жұмысының анықтылығын айтарлықтай жақсартады.

«Бұдан басқа, татуластыру және сотқа дейінгі реттеу шарасының қолданылу аясы кеңейеді. Татуласу шарасын кеңінен қолдану сот жүйесіне жүктемені азайтатын болады. Ең бастысы, дауды шешу мерзімі қысқарады», - деді Мемлекет басшысы.

«Жаңа Кодекстің бұл нормалары соттық қорғау жүйесінің тиімділігін арттыруға бағытталған. Жалпы, азаматтық іс жүргізу заңнамасын жетілдіру мақсатында қыруар шаруа атқарылды», - деп түйді Н. Назарбаев.