Таныстық арқылы аймақта жұмыс істеуге болады, алайда таныстық арқылы елдің мүддесін қорғау мүмкін емес - Н. Ерімбетов

«Бүгінгі таңдағы проблемаларды алып талқылайық. Ешқашан естімейтін суицид проблемасы бар. Сіздер бұл проблеманы үкімет төрағаларынан естідіңіздер ме? Жоқ! Бүгін бұқара Қазақстанның алкогольді қолдану жағынан көш бастап, алдыңғы қатардың біріне шыққанын айтып жатыр. Бұл мәселе көтеріле ме? Жоқ! Ал, біз не туралы айтамыз? Ғарыш туралы, ғарышқа ұшу туралы? Бүгін елімізді Кедендік Одақтың келіссөздерінде кім қорғап жатыр? Бұл жағдайды үкімет өкілдері де мойындап отыр. Президентпен бірге Путинмен келіссөздер жүргізуге баратын топ құрамында кімдер бар? Қайда олар? Таныстық арқылы аймақта жұмыс істеуге болады, алайда  таныстық арқылы елдің  мүддесін қорғау мүмкін емес», - деді Н. Ерімбетов.

Сонымен қатар,ол Президенттің  үкіметтің  кеңейтілген отырысында айтып өткен проблемаларды да көтерді.

«Президент 11 қазанда айтып өткендей проблемалар бар. Мәселен, қазақстандықтардың несиеге құнығып алуы. Бүгінгі таңда банктердің  кәсіпкерлерге ақша беруі тиімді емес. Оларға бір жұмыскерді тауып алып, тұрақты айлығы бар біреуге несие берген артық. Банкирлердің алдына ондай мақсат кім қойды? Неге олар бұрынғыдай бәс тігіп кәсіпкерлерге несие бермейді?», - деді ол.

«Президент не болды? деген сұрақ қойды. Ол атап өткендей, соңғы жылы ШОБ субсидиялау 13 пайызға қысқарды. Ол адамдар енді қайда бармақ? Олар Президент айтпақшы көлеңкелі экономикаға барады», - деп Азаматтық альянс басшысы түйіндеді.

Оның айтуынша, өкінішке қарай үкіметтің кеңейтілген отырысында Президенттің қойған талаптары әлі де шенеуніктерге жетпеді. Сондай-ақ, үкімет Мемлекет басшысының тапсырмаларын өте баяу орындауда.