Австриядағы қазақстандық студенттер АТОМ жобасының идеясын қолдайды

1 Қараша, 2013 15:06

Австриядағы Қазақстан студенттері қауымдастығы өз замандастары арасында АТОМ жобасы жайындағы ақпараттарды таратып, қолдау білдіруге дайын екендіктерін білдірді. Бұл жайлы қауымдастық көшбасшылары Венадағы Қазақстан Елшілігіндегі АТОМ жобасының Құрметті елшісі Кәріпбек Күйіковпен өткен кездесуден кейін мәлімдеді, деп хабарлайды жобаның баспасөз қызметі.

«Австрияда оқып жатқан студенттер атақты суретші Кәріпбек Күйіковпен кездесті. Суретші Венаға өзінің фотокөрмесі мен өзінің жұмысын ядролық сынақтарды тыю туралы Келісім Ұйымының 41-інші сессиясы жұмысына барған болатын. К.Күйіков радиациялық әсер себебінен қолсыз дүниеге келген. Алайда ол көркемөнер туындыларын бақайы арқылы суреттейтін қабілетке ие болған», - делінген хабарламада.

Кездесу барысында қылқалам шебері АТОМ жобасының негізгі миссиясымен таныстыра кетуді ұмытпады.

Өз кезегінде студенттер қауымы Кеңес үкіметінің кесірінен қалған сынақтың Қазақстандағы ядролық әсері мен АТОМ жобасы жайлы дайындаған деректі фильмдерін көрсетіп, жарты ғасырға жуық зияны бар аталмыш қасірет жайлы білгендерімен бөлісті.

«Мен елімнің осындай жобаны қолға алғанын мақтан етемін. Біз АҚШ, Жапония, Германия секілді дамыған елдерге үлгі бола алдық. Біз үшін мұның мағызы зор», - дейді Вена университеті физика факультетінің студенті Нұргүл Кереева.

Айта кету керек, қазіргі уақытта Австрияда шамамен 300 қазақстандық студент білім алуда.

Барлық жаңалықтар