Алматыда шағын және орта кәсіпкерліктің шамамен 104 мың субъектісі тіркелген

1 Қараша, 2013 13:07

Алматыдағы белсенді шағын және орта кәсіпкерліктер саны биылғы жылдың 1 қыркүйегіндегі мәлімет бойынша 103 455-ті құраса, ондағы жұмыспен қамтылғандардың саны 374 750 адамды құрайды, деп хабарлады Алматы қаласының әкімі Ахметжан Есімов ОКҚ баспасөз конференциясында.

«Біз шағын және орта кәсіпкердіктің дамуына көп мән береміз. Қалалық бюджетке түсетін қаражаттың 64 пайызы кәсіпкерліктің шағын және орта түрінен түсетіні анық. Осы мақсатты біздің әкімдікте арнайы іскерлік қызмет те жұмыс істейді. Онда барлық бизнес-қауымдастық төрағалары мен мемлекеттік және құқық қорғау органдарының жетекшілері кіреді», - деді Алматы әкімі.

Естеріңізге сала кетейік, Мемлекет басшысы үкіметтің кеңейтілген отырысында банктердің шағын кәсіпкерліктерге несие беру жұмыстарының баяулағанын айтқан. 2013 жылы бұл көрсеткіш 13 пайызға төмендеп, керісінше тұтынушылық несиелер 50 пайызға артқаны анық.

«Осы жылдарда біз қаладағы инвестклиматты жөнге келтірдік. Көптеген шектеулерді алып тастап, құжаттама жұмыстарын барынша қарапайым түрге енгіздлік», - деп толықтырды А.Есімов.

Айта кету керек, 2013 жылдың 8 айында шағын және орта кәсіпкерліктер тарапынан 1 448,8 млрд теңгенің өнімі өндірілген. Ал олардан түскен салық құны 399,9 млрд теңгені құрайды.

Сонымен қатар, «Бизнестің жол картасы-2020» бағдарламасының бірінші және үшінші бағыты аясында 188 жоба 55,6 млрд теңгенің субсидиясын алған.