Алматыда 1000-нан астам экологиялық таза автобустар қызмет ететін болады – А.Есімов

1 Қараша, 2013 11:33

Алматыда 1000-нан астам экологиялық таза қоғамдық көліктер қолданысқа беріледі. Бұл жалпы қоғамдық көлік санының 60 пайызы, деді Алматы қаласы әкімі Ахметжан Есімов ҚР Президенті жанындағы Орталық коммуникациялар қызметінің баспасөз отырысында.

«Алматыда экологиялық жағдайды жақсарту жөнінде кешенді шаралар қабылдануда. Мегаполистің басты экологиялық проблемасы ауаның ластануы. Оның ішінде жалпы ластану көлемінің 80% автокөліктердің үлесінде. Орташа есеп бойынша бүгінде қалада 520 мың көлік бар. Ал күн сайын мегаполиске 200-300 көлік кіріп-шығады», - деді қала басшысы.

Әкімнің айтуынша, автокөліктердің зиянды газ шығару нормасына бақылау жасау үшін қалаға кіретін негізгі жолдарға экологиялық бекеттер қойылған. Осы жылдың 9 айы ішінде осы бекеттерде 31 880 ауытқушылықтар анықталды. 125 млн. 848 тыс. 884 теңге әкімшілік айыппұл салынды.

«Бәрінен бұрын біз көліктердің жанар-жағармай сапасын тексеруді қолға алдық. Екіншіден қалаға кіре беріс жерлерде биыл 13 экопост орнаттық. Оның қызметі кіретін көліктердің стандарттарға сай келер-келмесін анықтау. Бүгінге дейін осы тексеріс бойынша 30 мыңнан астам көлік жүргізушісіне айыппұл салынды», - деп жалғады сөзін А.Есимов.

Қаладағы көлік қозғалысын жеңілдету мақсатында 4 автовокзалдың құрылысының жобалық-сметалық жұмыстары басталды. Ондағы көлік тұрағының орны шамамен 5 мыңды құрамақ.

Қала басшысының мәліметінше, Алматыға 17 трамвай мен 195 троллейбус алынған. Ал экологиялық транспорт саны қазіргі уақытта 675-ті құрайды.