Көкшетауда кәсіпкерлерге қызмет көрсету орталығы ашылды

1 Қараша, 2013 11:45

Кеше, 31 қазанда Көкшетауда «Даму» кәсіпкерлікті қолдау қорының аймақтық бөлімшесі жанынан Кәсіпкерлерге қызмет көрсету орталығы ашылды, деп хабарлайды Ақмола облыстық әкімдігінің баспасөз қызметі.

«Орталықтың қызметі арқылы кәсіпкерлер мемлекттік қолдау жайында әр түрлі сұрақтарға қатысты кеңес ала алады, «Бір ғана терезе» арқылы қаржылай көмек алу үшін құжаттар жинай алады», - делінген хабарламада.

Орталық базасында экономиканың түрлі салалары бойынша кәсіпкерлікті қолға алу мәселесі жайында форум, семинар, түрлі шаралар ұйымдастыруға мүмкіндік бар.

Сонымен қатар, мұнда кәсіпкерліктің негізгі заңдылықтарын үйрету бойынша курс өткізіледі. Бір сөзбен айтқанда, кәсіпкерлерге бұл жерде кешенді қызмет көрсетіледі.

«Аталмыш жүйе аудандық дәрежеде 2013 жылдың екінші маусымынан бастап іске қосылған кәсіпкерлікті қолдау мобильді орталығы тарапынан таныстырылған. Бүгінде орталық кәсіпкерлерге 150-ден астам кеңес берді».

Хабарламада айтылғандай, Кәсіпкерлікті қолдау орталығы Степногорск қаласында да жұмыс істеуде. Ол жерден кәсіпкерлер 550 кеңес алған.