«Жұмыспен қамту - 2020» бағдарламасы бойынша Жамбыл облысында 750 маман жастар тәжірибесінен өтеді
1 Қараша, 2013 11:20
2013 жылы «Жұмыспен қамту – 2020» бағдарламасы аясында биыл 750 адамға арнайы жолдама беру жоспарланған. Қазіргі таңда оның 400-ден астамы түрлі салалар – кәсіпорындар мен өндіріс орындарындарында еңбек етуде, деп Жамбыл облысы ішкі саясат басқармасы хабарлады.
«Тараз қаласында 462 жас түлек Жастар тәжірибесі бойынша жолдама алған. Олардың 335-і арнаулы орта, 127-і жоғары білімді. Аталған бағдарлама бойынша түрлі салада еңбек еткен 207 азаматтың бүгінде 86-ы тұрақты жұмыспен қамтылып отыр», - деп хабарламада нақтыланған.
«Жұмыспен қамту 2020» бағдарламасының мақсаты тұрақты және нәтижелі жұмыспен қамтуға жәрдемдесу арқылы халықтың табысын арттыру. Қазіргі күнде түлектердің арнайы жолдамамен жұмысқа орналасуға, мемлекеттен қаржылық қолдау алуға мүмкіндіктері бар.
