Жамбыл облысының өзге ұлт өкілдерінің арасында қазақ тілін қолдану ауқымы кеңеюде

1 Қараша, 2013 10:55

«Тіл – халық жанын танудың кілті» тақырыпта облыстық тілдерді дамыту басқармасының ұйымдастыруымен қазақ тілін еркін меңгерген орыс ұлты өкілдерінің арасында сайыс өтті. Оған Тараз қаласы мен облыс аудандарынан 17 үміткер қатысып, тіл бәсекесінде өзара сынға түсті, деп Жамбыл облысы ішкі саясат басқармасы хабарлады.

«Мемлекеттік тілдің қолданыс аясын кеңейту мен өзге ұлт өкілдері арасында қазақ тіліне деген сүйіспеншілікті арттыруды көздеген бұл жарыс 2008 жылдан бері дәстүрлі түрде өткізіліп келеді. Жылдан жылға қатысушылардың қатары да толығуда. Биылғы жылы 17 үміткер ниет білдірген», - деп хабарламада нақтыланған.

Тіл білгірлері үш номинация бойынша сынға түсті. Ұсынылған тақырып бойынша ауызша тұсаукесер жасауда туған өлкенің тарихымен таныстырса, жазбаша және ауызша бөлігінде қатысушылар қазақ тілінде эссе жазып, түрлі сауалдарға жауап берді. Ал шығармашылық тапсырмада орыс жастары қазақтың әндерін шырқап, көркем шығармадан үзінді көрсетті.

Қазақ тілінде еркін сайраған орыс жастары байқау барысында өздерінің мемлекеттік тілді меңгеру деңгейін көрсетумен қатар, өздерінің білімділігн дәлелдеуге тырысты. Облыстық деңгейдегі жеңімпаздар бағалы сыйлықтармен, алғыс хаттармен марапатталып, бас жүлдені иеленген үміткер республикалық жарысқа жолдама алды.

Барлық жаңалықтар