Израильде Нұрсұлтан Назарбаев атындағы тоғайға жаңа талдар отырғызылды

19 Қазан, 2015 20:07

Израильдегі Қазақстанның Елшілігі «Керен Каемет ле-Исраэль» еврей ұлттық қормен бірлесіп Президент Нұрсұлтан Назарбаев атындағы тоғайға жаңа талдар отырғызу рәсімін өткізді, деп хабарлады ҚР СІМ.

Естеріңізге сала кетейік, тоғай 2000 жылы сәуірде ҚР Президенті Нұрсұлтан Назарбаевтың Израильге ресми сапары аясында Бейт-Шемеш қаласының маңында ТМД еврейлер жамағаты федерациясымен отырғызылды. Ол Израиль халқының Н.Назарбаевтың екі ел арасындағы байланысты нығайтуға қосқан үлесін мойындауын білдіреді.

Жалпы Израильде достастық президенттерінің атымен аталған алты жасыл желек бар. Н.Назарбаев атындағы тоғай Израиль Президентінің құрметіне отырғызылған орманның ішінде орналасқан. «Керен Каемет ле-Исраэль» еврей ұлттық қорының департамент директоры Игаль Ясиновтың айтуынша, Қазақстан Президенті мемлекеттің қақ ортасында орналасқан аталмыш орманда оның атымен аталған тоғай бар жалғыз шет мемлекеттің басшысы.

«Бұл ерекше деңгейдегі құрметті білдіреді», - деп толықтырды И. Ясинов.

Ағаштарды отырғызуға ҚР-ның Израильдегі елшісі Дулат Қуанышев, Қазақстанның құрметті консулы Давид Люксембург және «Керен Каемет ле-Исраэль» еврей ұлттық қорының өкілдері қатысты.

Барлық жаңалықтар