А.Досымов: Әскерден қашқан азаматтар 1000 АЕК көлемінде айыппұл төлейді
19 Қазан, 2015 13:54
Әскерден қашқан азаматтар 1000 АЕК көлемінде айыппұл төлейді, деді ҚР ҚК Бас штабының ұйымдастыру-мобильдеу жұмысы департаментінің әскери емес және жедел қызмет әскерге шақырушылар бөлімінің бастығы Азамат Досымов ОКҚ-да.
«Өткен жылы қабылданған Қылмыстық кодекстiң 387-бабы бойынша заңды себептерсiз әскери қызметтен жалтарғаны үшiн, соның iшiнде өз денсаулығына қасақана зиян келтiру немесе құжаттарды бұрмалау бойынша әскери борышын өтеуден бас тартса, онда бұл әрекетi үшiн 1 мың АЕК көлемiнде айыппұл қарастырылған», - деді ол.
А.Досымов атап өткендей, бұл шамамен 3,5 млн теңге болмақ. Сондай-ақ, ол азаматтардың әскерден жалтармауы үшiн олардың өздерiмен, ата-аналармен тұрақты түрде түсiндiру жұмыстары жүргiзiлетiнiн айтты.
Брифингте мәлiм болғандай, биылғы жылдың 1 қазанынан бастап бас штабта жедел желi iске қосылған. Жедел желiге телефон шалу арқылы кез-келген азамат әскери борышын өтеуге қатысты өзiне қызықты мәлiметтерге жауап ала алады.
Индира Кауметова
