• Басты
  • Күз мезгiлінде 12 мыңға жуық азамат әскерге шақырылады
19 Қазан, 2015 12:36

Күз мезгiлінде 12 мыңға жуық азамат әскерге шақырылады

Биылғы жылдың күз мезгiлінде Қазақстанның Қарулы күштерiнiң қатарына 12 мыңдай азамат шақырылады. Бұл жөнiнде ҚР Президентi жанындағы Орталық коммуникациялар қызметiнде ҚР Қарулы Күштері қатарына жедел әскери қызметке күзгі шақырудың барысы жөнiнде өткен баспасөз мәслихатында Жинақтау басқармасының басшысы, ҚР ҚК БШ Ұйымдастыру-жұмылдыру жұмыстары департаментi бастығының орынбасары – жасақтау басқармасының бастығы Амантай Өсербаев мәлiмдедi.
Күз мезгiлінде 12 мыңға жуық азамат әскерге шақырылады

«Осы жылы күзде Қазақстан Республикасы Қарулы күштерiнiң қатарына 12 мыңдай азамат шақырылады. Бұл – 18-25 жас аралығындағы әскери мерзiмдiк қызметтен кейiнге қалдыруға мүмкiндiгi жоқ және әскери мерзiмдiк қызметтен босатуға мүмкiндiгi жоқ азаматтар. Аталған жұмыстар ҚР «Әскери қызмет және әскери мәртебе туралы» заңына сәйкес ұйымдастырылады. Қазiргi уақытта жергiлiктi әкiмдердiң шешiмiмен барлық облыстарда әскерге шақыру комиссариаттары құрылған», - дедi ол. 

А.Өсербаев осы жұмыстарды жүзеге асыру үшiн Мемлекет басшысы ақпан айында сәйкес Жарлыққа қол қойғанын айтты.

«Әскерге шақыру жұмыстарын ұйымдастыру жергілікті атқарушы органдардың мойнына жүктеледі. Сондықтан, əскерге шақыру комиссиясының төрағасы болып жергілікті əкімнің орынбасары, медициналық сараптама комиссиясының төрағасы болып жергілікті денсаулық сақтау басқармасының басшылары тағайындалады»,-деп түсіндірді А.Өсербаев.

А.Өсербаевтың  айтуынша, əскерге шақырылып отырғандардың арасында техникалық білімі бар жігіттер əуе қорғаныс саласындағы əскери бөлімдерге, ал спортқа икемі барлар аэроұтқыр əскрлердің қатарына, жалпы, денсаулығы жарамды қалған жігіттер əр түрлі əскери бөлімдерге жіберіледі.

Индира Каумеова 

Барлық жаңалықтар