Ә.Исекешев: Ақтөбе рельсті арқалық зауыты толық қуатына шыққанда кәсіпорында 760 адам еңбек етеді
19 Қазан, 2015 10:56
Ақтөбе рельсті арқалық зауыты толық қуатына шыққанда кәсіпорында 760 адам жұмыс істейтін болады. Бұл туралы Инвестициялар және даму министрі Әсет Исекешев Ақтөбе рельсті арқалық зауытының алғашқы өнімін шығару рәсімінде айтты, деп хабарлады ҚР ИДМ.
Бұл кәсіпорынды индустриаландыру бағдарламасы аясында «Қазақстан Темір жолы» Ұлттық компаниясы жеке инвесторлармен бірге салды. Зауыт ұзындығы 120 метр рельс, сонымен бірге орта пішінді илек бұрыштықтар, швеллерлер және арқалықтар шығарады. Жылына 430 тонна өнім өндіру көзделіп отыр.
Кәспорында жоғары сапалы өнім шығаруға мүмкіндік беретін заманауи технологиялар қолданылады. Ақтөбе рельсті арқалық зауытының өнімдеріне шетелдіктер қазірдің өзінде қызығушылық білдіріп отыр. Орталық Азия аймағы нарығына бағытталған бірнеше келісімге қол қойылған. Грузия, Иран, Ресей, Беларусь, Армения, Әзербайжан, Ауғанстан, Литва және Қытай нарығына шығару көзделіп отыр.
