ҚР ҚК екі офицері Батыс Сахарадағы БҰҰ-ның миссиясынан Қазақстанға оралды (ФОТО)

16 Қазан, 2015 09:31

Қазақстан Қарулы Күштерінің екі сардары БҰҰ-ның миссиясынан оралды. Капитан Темірлан Мүсәпіров пен майор Бақтияр Ақбалаев Батыс Сахарада (MINURSO) референдум өткізу бойынша Біріккен ұлттар ұйымының миссиясына қатыса отырып, әскери бақылаушылар ретінде 30-дан аса елдің өкілдерімен қатар тура бір жылдарын африкалық елде өткізді, деп хабарлады Қорғаныс министрлігінің баспасөз қызметі.

Әскери қадағалаушыларға қойылатын талаптарды мінсіз және үлгілі орындағаны үшін бітімгершілік миссияны орындау барысында офицерлер БҰҰ-ның медальдарымен марапатталды. Қазір үйлеріне оралып, капитан Темірлан Мүсәпіров пен майор Бақтияр Ақбалаев ҚР ҚК-дегі өздерінің қызметтеріне кірісіп те кетті.

Қазіргі уақытта әскери бақылаушылар ретінде БҰҰ-ның бітімгершілік миссияларында жеті қазақстандық сардар қызмет өткеріп жатқанын айта кеткен жөн. Атап айтсақ, бесеуі Батыс Сахарасында (MINURSO) және екеуі Кот-д Ивуарда (UNOCI).

Жалпы алғанда, Қазақстан Батыс Сахарасындағы, Кот- д'Ивуардағы, Гаити мен Либериядағы БҰҰ-ның әрбір миссиясына бес офицерге дейін жолдауға әзір. БҰҰ-ның мандатына сәйкес әскери бақылаушылардың негізгі міндеттері жерүсті және әуеден патрульдеуді, түнгі бақылау бекетін ұйымдастыру мен өткізуден, алынған ақпаратты жинау және сараптаудан, қол қойылған келісімдердің сақталу және орындалу мониторингісінен, сондай-ақ жауапкершілік аймағында бұзушылықтарды айқындаудан тұрады.

Барлық жаңалықтар