Қазақстан мен Ресей арасында бірқатар құжаттарға қол қойылды (ФОТО)

15 Қазан, 2015 14:12

Бүгін Ақордада Қазақстан Республикасының президенті Нұрсұлтан Назарбаев пен Ресей Федерациясының Президенті Владимир Путин екіжақты келісім бойынша бірқатар құжаттарға қол қойды.

Екі мемлекет басшысы алдымен 1998 жылғы 6 шілдедегі ҚР мен РФ арасындағы жер қойнауын пайдалануға арналған егемендік құқықтарды жүзеге асыру мақсатында Каспий теңізі солтүстік бөлігінің түбін межелеу туралы келісімге өзгеріс енгізу туралы xаттамаға қол қойды.

ҚР Инвестициялар және даму министрі Әсет Исекешев пен РФ Көлік министрі Максим Соколов екі ел үкіметі арасында авиациялық іздестіру және құтқару саласындағы ынтымақтастық туралы келісімге қол қойды.

ҚР Аэроғарыш комитетінің төрағасы Талғат Мұсабаев пен Ресей Қорғаныс министрінің орынбасары Юрий Борисов екі ел үкіметі арасында Қазақстан аумағындағы жер учаскесін зымырандардың бөлінетін бөлшектері құлау ауданы ретінде пайдалана отырып, Домбровский позициялық ауданынан зымырандар ұшыруды жүргізу кезінде өзара іс-қимыл жасау тәртібі туралы келісімге қол қойды.

Анатолий Балушкин мен Андерсон Бу «БИПЭК Авто Қазақстан» және «АВТОВАЗ» арасындағы стратегиялық серіктестікті нығайтуға байланысты келісімге келді.

Суретке түсірген Азамат Әлиев