Маңғыстау облысында жыл басынан бері 286 мүгедек жұмысқа орналасты

«Жыл басынан бері жұмыспен қамту органына 392 мүмкіндігі шектеулі адам хабарласты, оның ішінде 204 ауыл тұрғыны бар. Нәтижесінде 286 маңғыстаулық жұмысқа орналастырылды. Оның ішінде 63 адам тұрақты жұмыс орнына, 118 қоғамдық ақылы жұмыстарға, 17 жастар тәжірибесімен,  52 уақытша жұмыспен қамтылды. Сонымен қатар, «ЖҚЖК-2020» бағдарламасының қатысушы атанған 66 мүгедектің 25 жұмысқа орналастырылды. Инфрақұрылым мен тұрғын үй коммуналды шаруашылықты дамытуға 12 жан, өз кәсібін дамытуға микронесие беру бойынша 7 маңғыстаулық қамтылды», - деді Маңғыстау облысы әкімінің кеңесшісі Владислав Трифонов.

Оның айтуынша, Қазақстанда «Мүгедектерді әлеуметтік қорғау туралы» заң  және Әкімшілік кодекс жұмыс істейді. Онда заң талаптарын орындамған адам әкімшілік шауапкершілікке тартылатыны ашық көрсетілген. Алайда заң астындағы көптеген актілер жетілдірілмеген, сондықтанда нормативті құжаттарда көптеген дүниелер көрініс таппайды. Осы ретте ҚР ДСӘДМ аталмыш саладағы заңжобаны дайындауда.

«Қиындығы сол, көптеген тұрғызылған нысандардың басым бөлігі бірнеше жылдар бұрын салынған, сондықтанда оларға қосымша подъездер, пандустар салу техникалық тұрғыда мүмкін емес. Бүгінде балама ретінде пандус орнына көтерме алаңдарды салу қарастырылуда», - деп атап өтті В. Трифонов.

Ағымдағы жылы аймақтағы әлеуметтік маңыздағы 28 нысан мүмкіндігі шектеулі жандарға қолжетімді болуы үшін талапқа сай жөндеуден өтті.