ІІМ алқа отырысында ведомствоның 2015 жылдың 9 айындағы жедел-қызметтік жұмысының қорытындысы талқыланды

15 Қазан, 2015 11:42

Астана қаласында Ішкі істер министрі Қалмұханбет Қасымовтың төрағалығымен министрліктің орталық аппаратының, өңірлік ішкі істер департаменттерінің, ведомстволық оқу орындарының басшылық құрамының қатысуымен Ішкі істер министрлігінің алқа отырысы өтті, деп хабарлады ведомство.

Отырыста ішкі істер органдарының 2015 жылдың 9 айындағы жедел-қызметтік жұмысының қорытындысы, сондай-ақ Мемлекет басшысының жергілікті полиция қызметін құру және жұмысын қамтамасыз ету жөніндегі тапсырмасын іске асыру бойынша шаралар қаралды.

Жергілікті полиция қызметінің бөліністерін құру және жұмыс істеуі мәселелері қаралды, 2015-2017 жылдарға арналған бөтеннің мүлкін ұрлауға қарсы іс-қимыл жөніндегі ведомстволық бағдарламаны іске асыру барысы талқыланды.

Алқада жедел-қызметтік жұмыстың кемшіліктерін жою және жандандыру, ұрлықтың алдын алу және ашу тиімділігін арттыру бойынша шаралар кешенін қабылдау міндеттелді.

Сонымен қатар алқа барысында тәрбие жұмысын жетілдіруге, ішкі істер органдарының кадрлық әлеуетін арттыруға, жеке құрам арасында қатаң тәртіпті қамтамасыз етуге, сондай-ақ сыбайлас жемқорлыққа қарсы күресті күшейтуге назар аударылды.

Алқа отырысының қорытындысы бойынша министрліктің орталық аппараты қызметтерінің және өңірлік департамент басшыларына нақты тапсырмалар берілді.