2012 жылдан бастап ірі қара саны 25%-ға өсті – АШМ

31 Қазан, 2013 12:48

Бүгін, 31 қазанда Орталық коммуникациялар қызметі брифингісінде ҚР Ауыл шаруашылығының вице-министрі Мүслім Өмірияев салаларды субсидиялау мәселелері жөнінде баяндады.

«2012 жылдан бастап мал басын селекциялау және көбейтуді субсидиялау механизмі ірі қара малының ішкі нарықтағы сұранысын арттыруға себеп болды. Осылайша нарықта аталмыш мал түрлері етінің тапшылығы пайда болды. Осы уақыт аралығында фермерлік шаруашылықтарда ірі қара мал басы санын 25%-ға дейін көбейте алдық», - деді вице -министр.

Оның айтуынша, «Агробизнес-2020» бағдарламасында қаржыландыру арқылы мал шаруашылығы өнімдерінің өзіндік құнын төмендету жолдары қарастырылды. Соның мысалы кепілдендірілген қаражат беру мен жаңа технологияларды сатып алуға субсидия бөлу.

«Осылайша 2014 жылы мал шаруашылығына республикалық бюджеттен бөлінетін қаражат 35%-ға көтерілді», - деді М.Өмірияев.

Естеріңізге сала кетейік, 11 қазандағы ҚР Үкіметінің кеңейтілген отырысында Мемлекет басшысы 2016 жылға қарай ет экспортын 60 мың тоннадан асыруды тапсырған болатын.

Барлық жаңалықтар