2013 жылдың соңына дейін Алматыда 28 мың ағаш отырғызылады

31 Қазан, 2013 11:03

Алматы қалалық Табиғи ресурстар басқармасы мегаполиске ағаш пен көшет отырғызу жұмыстарын бастайды. Биылғы жылдың соңына дейін 28 мың ағаш отырғызу жоспарланып отыр, соның 15 мыңы көктемде отырғызылды, деп хабарлайды Алматы қалалық Табиғи ресурстарды басқару және реттеу басқармасының баспасөз қызметі.

Соңғы үш жылда мегаполисте 34 мың апаттық жағдайдағы және кәрі ағаштар қырқылған, сонымен қатар 100 мың өсімдікке санитарлық күзеу жұмыстары жасалған.

Көкті жаңарту жұмыстары қалалық бюджет есебінен жүргізілумен қатар өтемақы ретінде де жүргізілуде. Өтемақы ретінде отырғызылатын ағаштар жеке және заңды тұлғалар тарапынан апаттық жағдайдағы және кәрі ағаштарды қырқығаны есебінен, мәжбүрлі түрде кескен ағашы есебінен отырғызылады. Осы тұрғыда әр компания өздері отырғызған көшеттер мен ағаштарды 2 жыл бойы бағып-күтіп тұруға міндеттеледі.

Сонымен қатар табиғи апаттар себебінен ағаштары жаппай қырылған «Медеу» табиғи паркінде де ағаш отырғызу жұмыстары қарқынды жүргізілуде. «Жаңа Алатау» Қоғамдық қоры есебіне келіп түскен қала тұрғындарының қаражаттары есебінен жыл басынан бері 6300 ағаш отырғызылды, келер жылға дейін бұл көрсеткішті 8000-ға жеткізу жоспарланған.

Бүгінгі таңда Алматыда ағаш отырғызу жұмыстары өте кеңінен жүргізіліп жатыр. Кезең басынан бері қалада 5 мыңнан астам ағаш түрлері отырғызылды.