Ақмола облысында «Өңірлерді дамыту» бағдарламасы аясында үш балалар ойын алаңы тұрғызылды

13 Қазан, 2015 08:53

Ақмола облысының Аршалы ауданында «Өңірлерді дамыту» мемлекеттік бағдарламасы аясында үш ауылда балаларға арналған ойын алаңдары тұрғызылды – деп Ақмола облысы ішкі саясат басқармасы жанындағы «Ақмола Медиа Орталығы» хабарлайды.

Жаңа әткеншектер, сырғанақтар, өрмелеуіштер, кішкентай балаларға арналған әр түрлі алаңқайлар, спорттық алаңдар Аршалы ауданының Түрген, Ақбұлақ, Константиновка ауылдарында балалар игілігіне берілді. Ақбұлақ ауылында балалар алаңы «Березка» бала бақшасының ауласында орналасқан.

Ойын алаңдары балалардың неше түрлі әткеншектерде тербеліп, жұмсақ құм үстінде ойын ойнап, таза ауамен демалу кезінде отыратын орындықтармен, сондай-ақ, ересек балаларға арналған белтемірлер және басқа да құралдармен жабдықталған.

Жобаның жалпы құны 3 млн. теңгені құрап отыр. «Өңірлерді дамыту» мемлекеттік бағдарламасы ауданда 2012 жылдан бастап іске асырылуда. Бағдарлама мақсаты – аудандағы әлеуметтік-экономикалық мәселелерді шешуге, ауылдық жерлердің инфрақұрылымын жақсартуға бағытталған.

«Бұл алаңдар балалар мен ата-аналардың көңілінен шығады деген сенімдеміз» - деді аудан әкімі Жомарт Нүркенов.