Ватикан Қазақстанға Орталық Азияның XVII-XVIII ғасырлардағы картасының көшірмелерін тапсырды

12 Қазан, 2015 17:13

Қазақстан халқы Ассамблеясының 20-жылдығын атап өту аясында 2015 жылдың 8 қазанында Ватиканда ғылыми-тәжірибелік конференция мен «Заманауи әлемдегі этносаралық және конфессияаралық келісім» фотокөрмесі өтті. Оны Әулие Престол жанындағы ҚР Елшілігі Діниаралық келісім бойынша папалық кеңеспен бірлесіп ұйымдастырды, деп хабарлады ҚР СІМ.

Шараға ғылыми ортаның өкілдері, БАҚ және Ватикан мемлекетінде тіркелген дипломатиялық корпустың басшылары қатысты.

Конференция қатысушылары алдында Ватикан жанындағы ҚР Елшісі Мұхтар Тілеуберді сөз сөйледі. Ол Қазақстан мен Әулие Престол арасындағы қарым-қатынастың жоғары деңгейін атап өтті.

Негізгі баяндаманы ҚР Парламенті Мәжілісінің депутаты Жұматай Әлиев оқыды, ол қатысушыларды ҚХА міндеттері мен функциялары, оны құрудағы мақсат туралы хабардар етті.

Ассамблеяның тарихына кеңінен тоқталған депутат Қазақстанда этносаралық келісімді құру мен қолдау көрсету жолындағы Ұлт көшбасшысы Нұрсұлтан Назарбаевтың ролін атап өтті.

Сонымен қатар, Діниаралық келісім бойынша папалық кеңестің хатшысы, әлие әкей Мигель Анхель Аюсо Гиксо баяндама оқыды. Ол Қазақстандағы діниаралық келісім мен әлеуметтік тұрақтылыққа жоғары баға берді. Сондай-ақ әулие әкей, Ватикан Қазақстан басшысының бастамаларына әрқашан қолдау көрсетіп, Әлемдік және дәстүрлі дін көшбасшыларының съезінің жұмысына белсенді қатысып келеді, деп хабарлады.

«Конференция қорытындысы бойынша Ватикан мұрағаттарында сақталып келген Орталық Азияның XVII-XVIII ғасырлардағы карталарын ресми тапсыру салтанаты өтті. Өз кезегінде, М. Тілеуберді Әулие Престолға Қазақстанның тарихи ғылымының дамуына көрсеткен қолдауы үшін алғыс білдірді», - делінген хабарламада.

Барлық жаңалықтар