Сенатта мемлекеттік-жекешелік әріптестік саласын жетілдіруге бағытталған заң жобалары қаралды
«Құжат Мемлекет басшысы ұсынған бес институттық реформаны жүзеге асыру мақсатында әзірленген. Бір жағынан мемлекеттік-жекешелік әріптестіктің қатысушылары мемлекет немесе квазимемлекеттік субъектілер және екінші жағынан – жеке кәсіпкерлік, сондай-ақ осы жобаларды қаржыландыруды қамтамасыз ететін қаржы ұйымдары болып табылады. Мемлекеттік органдардың өкілеттігін заңнамалық реттеу үшін заң жобасымен мемлекеттік-жекешелік әріптестік саласындағы мемлекеттік саясатты әзірлеу және жүзеге асыру жөніндегі тиісті құзыреттер бекітілген», - деді Ұлттық экономика вице-министрі Марат Құсайынов.
Сондай-ақ, мемлекеттік-жекешелік әріптестіктің жергілікті жобасын қолдаудағы Ұлттық кәсіпкерлер палатасының қатысуы жөніндегі құқықтық өкілеттіктер айқындалған.
Вице-министрдің айтуынша, мемлекеттік-жекешелік әріптестік объектісінің құқықтық режимі нақтыланған, ол жекеше әріптестің инвестициялық шығынын өтеген кезде мемлекеттік меншікке беруге жатады.
Халықаралық тәжірибеге сәйкес заң жобасы мемлекеттік-жекешелік әріптестік шартының орындалмауына ықпалын тигізетін өздерінің шарттық міндеттерін бұзған жағдайда жекеше әріптесті алмастыру жөніндегі нормалармен толықтырылған. Мұндай алмастыру айрықша мәнді мемлекеттік-жекешелік әріптестік жобасына ғана қатысты жүзеге асырылатын болады.
Сондай-ақ Комитетте заңнамаға мемлекеттік-жекешелік әріптестік саласындағы түзетулер қаралды. Заң жобасымен бірқатар заңнамалық актілеріне өзгерістер мен толықтырулар енгізіледі.
Мемлекеттік-жекешелік әріптестік жобалары бойынша мемлекеттік міндеттемелердің орындалуын қаржыландыру бөлігінде мемлекеттік қаржылық бақылау органдарының құзыреті нақтыланды.
Индира Кауметова
