Қазақстанның аусылдан еркін аймақ ретінде өтінішін 180-ге жуық мемлекет - ХЭБ мүшелері қарастырады

10 Қазан, 2015 12:26

Халықаралық эпизоотиялық бюроның бас директоры доктор Бернард Валла Астанадағы ҚР АШМ ВБҚК Ветеренария бойынша ұлттық референт орталығын аралады. Жұмыс сапары аясында доктор Бернард Валла мен ҚР ауыл шаруашылығы вице-министрі Гүлмира Исаевамен бірге ВҰРО қызметімен, атап айтқанда жануарлардың инфекциялық ауруларын диагностикадан өткізетін зертхананың жұмысымен танысты.

«Халықаралық эпизоотиялық бюроның бас директорының бұл сапары Қазақстан үшін өте маңызды. Бұл біздің еңбегіміздің бағалануы. Біз үлгіге айналдық. Посткеңестік кеңістіктегі елдер ішінде, Украина мен Беларусияны есепке алмағанда үлгіге айналды. Әрине Украина мен Беларусияда бұл ауру тіркелмеген. Ал, Қазақстанның аусыл ауруы бар мемлекет ретінде 9 облысы одан озат болды. Ресей бізбен бірге өтініш берген болатын, алайда олардың өтініші әлі де қарастырылуда, олар осы мақсатта жұмыстарын жалғастыруда. Беларусия ветеринариялық қызметтің жұмысын бағалау бойынша өтініш берді, Қырғызстанда өтініш берді, олар келер жылы қарастырылатын болады», - деді Г.Исаева.

Өз кезегінде Бернард Валла, Халықаралық эпизоотиялық бюро Қазақстанның аусылдан еркін аймақ ретінде өтінішін қарастырып жатқанын атап өтті.

«Өткен жылы Қазақстан аумағының басым бөлігі аусылдан еркін деген мәртебеге ие болды. Бұл осы аймақта мәртебе алған алғашқы мемлекет. Ағымдағы жылы Қазақстанның екінші өтініші қарастырылуда, ол Қазақстанның аумағы 100% аусылдан еркін дегенді білдіреді», - деді ол.

Айта кетерлік жайт, өтініш бойынша жауап 2016 жылы мамыр айында Парижде өтетін ХЭБ бас сессиясында беріледі. Дауыс беруге 180-ге жуық мүше мемлекеттер қатысады.

Анар Тәңірқұлова

Барлық жаңалықтар