Мәжілісте ҰҚШҰ елдеріне арнайы техника жеткізудің жеңілдікті шарттары туралы келісімге енген өзгертулер қаралады

9 Қазан, 2015 12:09

Палата Спикері Қабиболла Жақыповтың төрағалығымен Мәжіліс Бюросы өтіп, жалпы отырыстың күн тәртібі нақтыланды, деп хабарлады Мәжілістің баспасөз қызметі.

Халық қалаулылары назарына бірқатар ратификациялық заң жобалары ұсынылып отыр. Олар: 2007 жылғы 6 қазандағы Ұжымдық қауіпсіздік туралы шарт ұйымына мүше мемлекеттердің құқық қорғау органдары мен арнайы қызметтерін жарақтандыру үшін арнайы техника мен арнайы құралдарды жеткізудің жеңілдікті шарттары туралы келісімге өзгерістер енгізу туралы екінші хаттаманы ратификациялау.

Осы хаттамаға сәйкес, төтенше жағдайлардың алдын алу мен оларды жою кезінде авариялық-құтқару жұмыстарын жүргізуге арналған құралдарды жеңілдікпен жеткізу тетігі жасалады.

Сонымен қатар, Мәжіліс депутаттары Латвиямен адамдардың реадмиссиясы туралы келісімді, сондай-ақ, Қазақстан мен Бенилюкс мемлекеттері (Бельгия Корольдігі, Люксембург Ұлы Герцогтігі және Нидерланд Корольдігі) арасындағы реадмиссия туралы келісімді және оны іске асыру хаттамасын ратификациялау туралы заң жобаларын талқылайды.

Барлық жаңалықтар