ҚР Мемлекеттік хатшысы Г.Әбдіхалықова «Қазақ хандығына 550 жыл» деректі көрмесіне қатысты

9 Қазан, 2015 11:32

Мемлекеттік хатшы Гүлшара Әбдіхалықова Қазақстан Республикасының Ұлттық мұрағаты және Археография мен деректану ұлттық орталығына сапары аясында «Қазақ хандығына 550 жыл» деректі көрмесін ашты, онда «Мәдени мұра» мемлекеттік бағдарламасы аясында ашылған Қазақ хандығының тарихы бойынша құжаттардың түп нұсқасы қойылған.

Айта кетерлік жайт, тарихи құжаттар «Мәдени мұра» мемлекеттік бағдарламасын жүзеге асыру аясында Венгрия, Мысыр, Иран, Қытай, Польша, Греция, Ресей, АҚШ, Түркия, Өзбекстан, , Франция, Испания елдерінің мұрағаттарында және ғылыми мекемелерінде, сонымен қатар еліміздің беделді қоғам қайраткерлерінің жеке қорларынан табылған.

«Бұл кездесу мұрағаттық істің маңызды мәселелерін талқылауға мүмкіндік береді. Өздеріңіз білетіндей, Елбасы ұсынған «Мәңгілік Ел» жалпыұлттық идеясы халықтың берік тарихи іргетасына негізделген. Мұрағаттық құжаттарды зерттеу, сақтап қалу, олардың танымалдылығын арттыру сынды жұмыстарды тереңірек жүргізу өте маңызды. Себебі мұрағаттық құжаттар ел тарихынан сыр шертеді және қоғам өмірінің хроникасы, ол адамдардың тағдырының деректі куәлігі», - деді ҚР Мемлекеттік хатшысы Г.Әбдіхалықова.

Археография мен деректану ұлттық орталығы кітаптар көрмесін ұйымдастырды, аталмыш басылымдар «Мәдени мұра» бағдарламасын жүзеге асыру аясында анықталған деректер негізінде жазылған.

Сонымен қатар, Мемлекеттік хатшы тарихымыз бен мәдениетімізден сыр шертетін құжаттарды сақтау бойынша материалдық-техникалық базаның бүгінгі жағдайымен танысты.

Айта өтейік, «Қазақ хандығына 550 жыл» деректі көрмесін тамашалауға беделді мемлекеттік қайраткерлер, Қазақстан Республикасы Парламенті депутаттары, мемлекеттік органдардың өкілдері, ғалымдар, тарихшылар және мұрағатшылар келді.

Ботагөз Айтжанова

Барлық жаңалықтар