Павлодар облысында автокөлікке арналған алюминий дискілер шығаратын зауыт салу жоспарланған

Ертең «Ертіс Инвест – 2015» халықаралық инвестициялық форумы аясында Новосібірдің «СибИнвестГруп» компаниясымен «Павлодар облысы аумағында автокөлікке арналған алюминий дискілер шығаратын зауыт салу» жобасын іске асыру жөніндегі меморандумға қол қою жоспарланып отыр.

«Бұл жоба облысты дамыту тұрғысынан аймағымыз үшін өте маңызды, сондықтан оның іске асырылуы барысында жан-жақты қолдау көрсететін боламыз»,- деп атап өтті облыс әкімі.

Кездесу барысында тараптар сондай-ақ инвестициялық саясаттағы өзара ынтымақтастық турасындағы ұсыныстарды талқылады.

Облысымызда инвесторлар үшін жақсы жағдай жасалған. Аймағымыздың бәсекелік артықшылығы мол: географиялық тұрғыдан тиімді орналасуы – Ресейдің шекаралас нарығына шығу мүмкіндігі бар, транзиттік мүмкіндіктер, айтарлықтай табиғи қорлардың және жобаларға арналған жер телімдерінің бар болуы, дамыған өнеркәсіптік және көліктік инфрақұрылым, арзан электр қуаты, салықтық жеңілдіктері бар жұмыс істеп тұрған «Павлодар» арнайы экономикалық аумағы. Сондай-ақ облысымызда Аймақтық ғылыми-технологиялық орталық, Start-up академиясы, Аймақтық технологияларды коммерциялау орталығы, Инвестицияларды тарту агенттігі және басқа да бірқатар құрылымдар ашылды.

Сонымен қатар, Қанат Бозымбаев екі облыстық орталық арасында әуе қатынасын ашу мәселесін пысықтауды ұсынды.