ҚР армия спортшылары еркін күрестен VI Дүниежүзілік армия ойындарында үздіктер үштігінде (ФОТО)

7 Қазан, 2015 20:42

VI Бүкіләлемдік армия ойындарының алғашқы сайыс күнінің қорытындысы бойынша Қазақстан Республикасы Қорғаныс министрлігі Армия орталық спорт клубының спортшылары еркін күресте 3 медальді (1 күміс және 2 қола) қанжығаларына байлады, деп хабарлады Қорғаныс министрлігінің баспасөз қызметі.

Оларға осы додада сайысқа түскен 37 елдің 234 спортшысы арасында алдыңғы қатарға шығуға және көшбасшылар үштігінде болуға қол жеткізді. Күміс медальді командаға 57 келіге дейінгі салмақта өнер көрсеткен ҚР спорт шебері, әлем чемпионаттарының жүлдегері Владимир Кудрин әкелді.

Екі қола медальді 74 келі салмақта халықаралық дәрежедегі спорт шебері, әлем чемпионы кіші сержант Ғалымжан Үсербаев пен 65 келі салмақта ҚР спорт шебері, әлем чемпионатының жүлдегері ефрейтор Азат Сақаев иеленді.

Естеріңізге сала кетейік, бұл күндері Оңтүстік Кореяда армия спортының Бүкіләлемдік Кеңесі (CISM) шеңберінде VI Дүниежүзілік жазғы армия ойындары шеңберінде өтуде. Ол 4 жылда бір рет өткізіледі және ауқымы бойынша Олимпиялық ойындармен салыстырғанда әскери қызметшілер арасындағы ең үлкен спорттық турнир болып табылады. Осы жылы ойындарға әлемнің 130 елінен жиналған 8 500-ден аса спортшы қатысады.

Еліміздің намысын ҚР ҚК Бас штабы бастығының орынбасары генерал-майор Мұқан Дүйсекеевтің басшылық етуімен ҚР ҚМ АОСК-ның 58 спортшысы қорғайды. Спортшыларымыз спорттың 11 түрінен өнерлерін паш етеді. Атап айтқанда, еркін және грек-рим күресі, спорттық бағдарлау, дзюдо, жүзу, оқ ату, қазіргі заманғы бессайыс, әскери бессайыс, таэквондо, жеңіл атлетика және бокс.

Барлық жаңалықтар